2007年09月03日
仲係soft launch的沛公甜品，實在係正!其實未真係launch前我都食過好多，點解呢？因為係我表妹同佢男朋友得意之作。
甜品係我最愛，所以要求都好高。Soft launch wor，梗係要找我去試食。今晚食左紅豆沙，我覺得係全晚驚喜。其實紅豆沙好似好普通，但要整得好食唔係咁易。唔好以為去酒樓食完飯有紅豆沙送就係表示紅豆沙好cheap，唔係太好食係一定架囉。今晚的紅豆沙係足料，少甜同埋有果皮香，好有屋企煲既味，好耐無食過喇。
另外亦試左芒果千層(其實以前食過好多次但係今個version最正)。呢個係最受歡迎產品之一，個千層既pancake皮好薄，一塊快咁煎好，攤凍再續層cream+芒果舖上去。我數過，有13層皮架，淨係做果擔心機同工夫都值回票價。 另一個最多人買既係心花怒放。因為太搶手，只係影左相，食唔到。佢其實係pancake包芒果布甸，要整真係唔易。上面既芒果花好靚呀!
我仲食左個椰汁布甸，好有椰味，不過都係上面果幾樣最正。
唔好以為佢地只得甜品，其實舖頭係區內好受歡迎，好多打躉fans既一間小小街坊食店，叫喜樂福，原本係買飯麵炒野呀，咖啡奶茶同新鮮麵包咁，最近就開埋宵夜做甜品小食，仲係試驗階段。佢果度既炒野同小菜都係出名好食。今晚我又試左個蜜汁焗雞翼。本來好飽但咁香忍唔住又食左一隻，非常非常非常好好好好好味!!!!仲有個甜酸醬既炸魚小食，都係一流!
地址： 喜樂福 荃灣荃德花園地下14號舖
如果你地去食，話係Vivien介紹話唔定會加料加送，哈哈!!
有相睇
餐牌
我最想食既紅豆沙河粉同白裡透紅售罄，好失望呀….
芒果千層班戟
心花怒放
芒果布甸係我地屋企人最愛
(4)
moShow
電子神童 Vivien
lomedia
女人Guide